प्रतिनिधी :- अशोक आव्हाळे
मांजरी : पुणे शहर पोलीस आयुक्तालयाच्या वतीने शहरात नव्याने पाच पोलीस ठाण्यांची निर्मिती करण्यात आली असून त्यापैकी मांजरी बुद्रुक येथील नवीन पोलीस ठाण्याचे उद्घाटन नुकतेच साध्या आणि शिस्तबद्ध पद्धतीने संपन्न झाले. हडपसर–मांजरी परिसरात झपाट्याने वाढणारी लोकसंख्या, वाढता नागरी विस्तार आणि त्यातून निर्माण होणाऱ्या कायदा-सुव्यवस्थेच्या प्रश्नांमुळे हडपसर पोलीस ठाण्यावर मोठा ताण येत होता. गुन्हेगारीवर नियंत्रण ठेवताना हडपसर पोलिसांना अनेक अडचणींचा सामना करावा लागत होता. त्यामुळे मांजरी परिसरात स्वतंत्र पोलीस ठाणे असावे, अशी मागणी स्थानिक नागरिकांकडून सातत्याने केली जात होती.
या मागणीची दखल घेत शासनाने मांजरी पोलीस ठाण्याला मान्यता दिली. पुणे शहर पोलीस आयुक्त अमितेश कुमार यांच्या मार्गदर्शनाखाली पुणे शहर पोलीस आयुक्तालयाच्या वतीने मांजरी पोलीस ठाण्याचे उद्घाटन करण्यात आले. या पोलीस ठाण्याचे उद्घाटन नवनियुक्त वरिष्ठ पोलीस निरीक्षक बाबासाहेब निकम यांच्या हस्ते झाले. मांजरी पोलीस ठाण्यात वरिष्ठ पोलीस निरीक्षकासह पाच अधिकारी आणि सुमारे ६० ते ६५ पोलीस कर्मचारी कार्यरत राहणार आहेत.
यावेळी बोलताना वरिष्ठ पोलीस निरीक्षक बाबासाहेब निकम यांनी सांगितले की,मांजरी व परिसरात कायदा आणि सुव्यवस्था अबाधित ठेवण्यासाठी आपण कटिबद्ध राहणार असून, नागरिकांच्या सहकार्याने गुन्हेगारीवर प्रभावी नियंत्रण ठेवले जाईल, असा विश्वास व्यक्त केला. नवीन पोलीस ठाण्यामुळे स्थानिक नागरिकांना तात्काळ पोलिस सेवा मिळणार असून गुन्ह्यांच्या नोंदी, तक्रारी आणि कारवाई अधिक जलद होणार असल्याचे त्यांनी सांगितले.
या कार्यक्रमास हडपसर पोलीस ठाण्याचे वरिष्ठ पोलीस निरीक्षक संजय मोगले, काळेपडळ पोलीस ठाण्याचे पोलीस निरीक्षक मानसिंग पाटील, सहाय्यक पोलीस निरीक्षक महेश कावळे, मांजरी गावचे पोलीस पाटील अमोल भोसले यांच्यासह वरिष्ठ पोलीस अधिकारी, कर्मचारी आणि मोठ्या संख्येने स्थानिक नागरिक उपस्थित होते.
मांजरी पोलीस ठाणे सुरू झाल्यामुळे परिसरातील नागरिकांमध्ये समाधान व्यक्त करण्यात येत असून, कायदा-सुव्यवस्था अधिक सक्षम होईल, असा विश्वास ग्रामस्थांनी यावेळी व्यक्त केला.